ПОЛИТИЧКИ ЗАСНОВАНА „ЖЕНСКА СОЛИДАРНОСТ“ ВО СОЦИЈАЛИСТИЧКА МАКЕДОНИЈА (РЕФЛЕКСИВЕН ТЕКСТ ЗА ИЗВОРОТ „МАКЕДОНКА – ОРГАН НА АФЖ“, 1944 – 1953 ГОДИНА)

Апстракт

Ова е рефлексивен текст посветен на списанието „Македонка – орган на Антифашистичкиот фронт на жените на Македонија“ (1944 – 1953), третирано како посебен периодичен извор. Како официјален орган на организацијата на жените на Комунистичката партија, и прво женско списание на македонски јазик, претставува примарен извор за следење на политичките и пропагираните обрасци на државата за еманципација на жените во рамките на социјалистичката држава. Овој извор може да биде клучен и во истражувањето на концептот и социјалните практики на солидарност меѓу жените. Мојата теза е дека, во рамките на агендата на АФЖ и теренската работа посветена на женската еманципација, се родиле нови односи меѓу жените, во смисла на родовата димензија на социјалниот живот. Оваа „сестринска солидарност“ била основана низ посветеноста на жените за исполнување/решавање на задачите околу родовите прашања во руралните заедници. Така, за првпат во македонскиот историски контекст, новото политичко дејствување на жените во општеството било поврзано со нивна мобилизација и сложена организација надвор од патријархалната структура на роднинските групи.