ПРЕБОЛУВАЊЕТО НА ТРАУМАТА ВО „КНИГАТА НА ИЛУЗИИТЕ“ ОД ПОЛ ОСТЕР

Апстракт

„Книгата на илузиите“, едно од најпознатите дела на Пол Остер, е метафизички роман во кој повеќето од ликовите доживуваат некаков вид траума. Овој труд ги обработува прашањата како главните ликови на романот се соочуваат, излегуваат накрај и дали ја преболуваат траумата во своите животи. Дејвид Зимер и Хектор Ман се ликовите низ кои ќе ја вршиме психоанализата. Потоа, преку нив ќе ги објасниме психолошките алатки и методи што ќе ни помогнат да ги разбереме концептите на живот и на смрт, не само во литературата туку и во вистинскиот свет. Психолошките концепти на Зигмунд Фројд ќе бидат објаснети и применети на ликовите и во специфични ситуации за да сфатиме како луѓето излегуваат накрај со траумата. Исто така, во ова истражување ќе се зборува за концептите на меланхолија и тагување, архивот, ид, его и суперего, ерос и танатос, кои ќе бидат објаснети со специфични примери од романот и од други дела. Меѓутоа, треба да се истакне дека траумата, како што е дефинирана од психолозите, не е нешто што може да се заборави и да се избрише, туку нешто што останува во психата и помага за да се изгради „карактерот“ на една личност, што се потврдува и со самиот роман.