„ПРОСТОР ЗА ПРЕВЕДУВАЧОТ/ПРЕВЕДУВАЧИТЕ“: ПОСТАВУВАЊЕ НА СТУДЕНТИТЕ ПРЕВЕДУВАЧИ ВО „ВИСТИНСКА КОЖА“

Апстракт

Во овој труд е претставен воннаставниот проект за преведување раскази Prostor za mokrog psa (2011) од српски на англиски јазик. Преведувачи беа 15 студенти, додипломци и постдипломци од Катедрата за англиски јазик на Универзитетот во Ниш. Преведувањето се одвиваше од февруари до јули 2017 г. и резултираше со издание насловено The place for the wet dog (2018). Тргнувајќи од концептот „ситуирано преведување“ (Situated Translation од Risku 2002), пристап од когнитивните науки што го претставува преведувањето како многу комплексен, когнитивен и културен процес без јасна структура (Kiraly 2005: 1103), во овој труд се презентирани резултатите од споредбата на различните верзии на преводите на студентите и неформалните коментари за време на групните и на индивидуалните консултации. Со операционализација на теоријата на преведување, го користиме приодот на „оспособување“ (Kiraly 2005), кој им помага на студентите да станат „проактивни учесници во нивното учење преку автентична, колаборативна работа, што води до автономија и експертиза“ (ibid., 1104). Фокусот е на проблемите поврзани со читателите (како да се привлечат странски читатели), со културниот и со историскиот контекст на расказите (разбирање на контекстот на поранешна Југославија) и преведувањето на различни дијалекти, социолекти и идиолекти. Иако се работи за воннаставна активност, проектот покажува дека автентични задачи за ситуирано преведување значително придонесуваат кон студентското учење и развој на компетенциите, односно за подготовка на студентите за задачи од реалниот живот.