ЕТНИЧКИОТ КОД НА ВЛАСИТЕ НА БАЛКАНОТ

Abstract

Етничкиот код претставува основа за етничка идентификација на секоја заедница по кој таа се издвојува од другите народи. Власите се една од заедниците за кои е пишувано од разни аспекти и секогаш со тенденција да се поврзат со идентитетот на некој друг народ, без да се води сметка за можноста околу нивниот посебен етнички идентитет. Така, на пример, тие се поврзуваат со: Романците, Римјаните, Грците, Тракијците, Илирите и др. Меѓутоа, ако се земе предвид фактот дека сите заедници настанале во разни историски периоди и под разни историски услови, тогаш најсоодветната дефиниција за етничкиот идентитет на Власите би гласела вака: Власите се заедница со свој посебен етнички код – име, јазик, антрополошки црти, народна носија, типични форми на занимање, посебен менталитет и сл. Во таа смисла ќе се обидеме да разработиме некои од посебностите на Власите по кои тие се идентификуваат како посебна заедница во етничкото милје на Балканот.