ЗАШТИТА НА ЛИЧНИТЕ ПОДАТОЦИ ВО АКАДЕМСКАТА СРЕДИНА: РЕГУЛАТИВИ, ПРЕДИЗВИЦИ И ПРАКТИКИ

Abstract

Обезбедувањето заштита на личните податоци во рамките на универзитетите е од суштинско значење за одржување на приватноста и безбедноста на студентите, вработените и факултетот како целина. Универзитетите треба да имплементираат технички и организациски мерки како што се контрола на пристап, шифрирање, редовна обука на вработените и планови за превенција и одговор на инциденти за заштита на податоците.
Целта на овој труд е да се анализираат мерките и механизмите што ги применува Филозофскиот факултет во Скопје за обезбедување заштита на личните податоци. За прибирање на валидни и длабински сознанија беше
спроведено квалитативно истражување преку полуструктурирани интервјуа со клучни службени лица, како и анализа на содржината на релевантни документи. За зголемување на научната релијабилност беше реализирано и квантитативно истражување со останатите засегнати страни (наставен кадар, административно-технички кадар и студенти). Во овој труд се презентирани главно резултатите и заклучоците изведени од примарните податоци добиени преку интервјуата и од секундарните податоци од прегледот на литературата и анализата на документи.
Добиените резултати покажуваат дека на Филозофскиот факултет се воспоставени соодветни политики и практики за заштита на личните податоци на сите засегнати страни. Во последниве години, донесени се 19 регулаторни акти за обезбедување различни видови информации. Воведени се значајни безбедносни мерки, особено во однос на личните податоци на студентите и вработените, резултатите од испитите и други критични информации поврзани со факултетот. Сепак, потребни се понатамошни подобрувања поради тековните закани за безбедноста на податоците.