ВЛИЈАНИЕТО НА ПРИМЕНЕТИОТ ТЕАТАР ВРЗ РАЗВОЈОТ НА ПУБЛИКАТА

Апстракт

Главната цел на трудoт е да се укаже на важноста на применетиот театар што се изведува надвор од класичниот однос на изведбата на сцена пред публика во театарска зграда. Улогата на применетиот театар е многу покомплексна и е насочена кон засилување на критичкото размислување и на самодовербата на маргинализираните социјални групи во заедницата, развивање креативни процеси во образованието со вклучувањето драма во едукацијата на учениците од основните и од средните училишта. Трудот укажува на функционалноста и на вредноста на сите техники што ги користи применетиот театар за да влијае врз формирањето нова театарска публика преку активности за анимација. Основната хипотеза во овој труд е да се докаже дека формите на применетиот театар влијаат врз развојот на културните потреби на публиката, како и дека, запознавајќи се со формите
на применетиот театар, публиката развива длабоко позитивен став кон театарот. Во трудот ќе се користи интердисциплинарен теориски метод, што подразбира употреба на следниве теории: теоријата на применетиот театар од Патрик Павис, Јакоб Леви Морено, Аугусто Боал; теориите за публиката
и за рецепцијата на уметнички дела на Викторија де Александер, Дарко Лукиќ, Маја Ристиќ, Предраг Огњеновиќ. Исходот од целото истражување треба да обезбеди теориски, но и практичен увид во можностите што ги нуди применетиот театар за развој на публиката во театарот.