ФЕНОМЕНОЛОГИЈА НА НАРОДНАТА РЕЛИГИЈА. ПРИМЕРИ ОД МАКЕДОНСКАТА НАРОДНА ТРАДИЦИЈА

Abstract

Проучувањето на еден многу значаен антрополошки проблем каков што е религијата претставува комплексен и сложен истражувачки предизвик. Имајќи ги предвид досегашните диференцирања на специфичните категории култура, сметаме дека е неопходно да се дефинираат и различните категории религиски системи. Се разбира, тука се задржуваме на категоријата религија што соодветствува на народната култура. Во етнолошката наука не постои дефинитивен консензус околу користењето на еден термин со кој треба да се опфати оваа специфична категорија. Митот, односно митското мислење се определувачките категории врз кои почива вкупниот систем на перцепирање и создавање на претставите на човекот за него и за светот. Во митовите се изнесени најсветите вистини за луѓето, за нивните предци, за нивната земја, така што е сосема разбирливо што овие фундаментални конституенти на идентитетот на луѓето се вреднуваат како свети вистини во свеста на луѓето и во нивните митски знаења и претстави.