Почитувани,
Со задоволство ги претставуваме новите броеви на списанието „Филолошки студии“. Нашето издание останува платформа, каде што се споделуваат идеите на претставниците на разни хуманистички дисциплини: лингвистика, наука за литературата, фолклористика, историја на културата итн. Меѓународното славистичко списание е отворено за соработка со истражувачите што ги претставуваат различните научни традиции и школи. Благодарение на ова, секоe издание покажува широк спектар на актуелни проблеми од современата филологија и од нејзините сродни дисциплини.
Првиот број на списанието е посветен на темата „Словенските култури во трансфер“. Во статиите, вклучени во него, се проучуваат динамични процеси во јазикот, во литературата и во културните традиции. Авторите се интересираат за меѓуетничките и за меѓународните интеракции, влијанија и позајмувања од другите култури, за механизмите на адаптација на позајмените елементи кон новото опкружување и за проблемите со преводот од сродните јазици.
Во двата броја за 2019 година се објавени триесет и девет статии. Им изразуваме благодарност на проучувачите од: Македонија, Русија, Белорусија, Словенија, Србија и Хрватска, за нивните научни трудови. Оваа година изданијата на списанието ги подготви Филолошкиот факултет на Пермскиот државен национален истражувачки универзитет. Објавувањето е остварено со учество и со поддршка на редовните партнери: Институтот за македонска литература на Универзитетот „Св. Кирил и Методиј“ во Скопје, Филозофскиот факултет на Универзитетот во Загреб, Филозофскиот факултет на Универзитетот во Љубљана и Институтот за литература и уметност во Белград.